» » Azərbaycan Ermənistanı oyundankənar vəziyyətə salıb - TƏHLİL

Azərbaycan Ermənistanı oyundankənar vəziyyətə salıb - TƏHLİL

Azərbaycan Ermənistanı oyundankənar vəziyyətə salıb - TƏHLİL
















Oktyabrın 30-da Azərbaycanın təşəbbüsü ilə tikintisi başa çatan Bakı-Tbilisi-Qars dəmir yolunun açılış mərasimi keçirildi. Bu layihə bir daha regionda Azərbaycanın əhəmiyyətini artırmaqla yanaşı, həm də siyasi və iqtisadi potensialını ortaya qoymuş oldu. Layihədə iştirak edən Azərbaycan, Türkiyə və Gürcüstandan fərqli olaraq, Ermənistan növbəti dəfə kənarda qaldı. İşğalçı ölkə bu dəfə 3 ölkəni birləşdirən "dəmir qollar”la növbəti dəfə təcrid vəziyyətinə düşdü.

2005-ci ildə Bakı-Tbilisi-Ceyhan və daha sonra Bakı-Tbilisi-Ərzurum neft və qaz kəmərlərinin işə düşməsi nəticəsində biz bunun şahidi olduq. İndi isə iqtisadi çətinliklər içərisində olan Ermənistan işğalçılıq siyasəti səbəbi ilə daha da ağır vəziyyətə düşəcəyi heç kimə sirr deyil. Bəs, görəsən Bakı-Tbilisi-Qars dəmir yolunun reallaşması nəticəsində Ermənistanın regionda təcridi hansı şəkildə özünü göstərəcək?

Mövzu ilə bağlı "Kaspi” qəzetinə açıqlamasında Milli Məclisin deputatı, politoloq Elman Nəsirov bildirdi ki, Bakı-Tbilisi-Qars dəmir yolu xətti tarixi bir layihədir və oktyabrın 30-da "Dəmir İpək Yolu”na start verildi: "Hesab edirəm ki, bu layihənin reallaşması nəticə etibarı ilə Ermənistanın işğalçılıq siyasəti ucbatından düşdüyü blokada vəziyyətini daha da mürəkkəbləşdirdi. Məsələ ondadır ki, Ermənistan öz təcavüz siyasəti nəticəsində Azərbaycanın təşəbbüskarı olduğu Bakı-Tbilisi-Ceyhan, Bakı-Tbilisi-Ərzurum neft və qaz kəmərlərindən və indi də Bakı-Tbilisi-Qars dəmir yolu xətti layihəsindən kənarda qaldı. Deməli, Ermənistanın iqtisadi blokadası güclənəcək və bu ölkədən miqrant axını, eləcə də yerli əhalinin yoxsulluq səviyyəsi daha da artacaq. Təsadüfi deyil ki, Ermənistanda Bakı-Tbilisi-Qars layihəsinin reallaşmasına bir faciə kimi yanaşırlar. Amma əslində bu faciəni özləri yaradırlar. İşğala son qoysunlar, onun nəticələrini aradan qaldırsınlar və bundan sonra Ermənistanın bu layihələrdə iştirakı məsələsinə baxıla bilər. Prezident İlham Əliyevin dediyi kimi, nə qədər ki bu təcavüzə son qoymayıb, Ermənistanın təcrid siyasəti daha da gücləndiriləcək. Biz bu gün onun şahidi oluruq”.

E.Nəsirovun sözlərinə görə, bu reallığı hesablayan dünyadakı, ABŞ-dakı erməni lobbisi və diasporu vaxtı ilə layihənin müzakirələrindən öncə çalışırdılar ki, Qars-Gümrü dəmir yol xətti işə düşsün: "Bu dəmir yolu xəttinin 66 kilometri Türkiyənin, cəmi 14 kilometri isə Ermənistanın ərazisinə düşür. Görəndə ki bu alınmadı, ümumiyyətlə Bakı-Tbilisi-Qars layihəsinə ermənilər ABŞ-dan və digər ölkələrdən əleyhinə çıxdılar. Hətta ABŞ Dövlət Departamenti vasitəsilə Dünya Bankına təsir göstərdilər ki bu layihə reallaşmasın. Bütün bunlar göstərir ki, dünyadakı ermənilər və onların lobbisi bu layihənin reallaşmasının əleyhinə nə qədər təsir mexanizmlərini işə saldılar. Amma bunların hamısı fiaskoya uğradı. O səbəbdən ki, Azərbaycan güclü dövlətdir, Türkiyə bizə dost və qardaşdır. Bu iki dövlətin səyləri və Azərbaycanın Gürcüstana maliyyə dəstəyi layihənin reallaşmasını təmin etdi. Hesab edirəm ki, bu gün Ermənistan rəhbərliyinin papağını qarşısına qoyub - əgər o papaq varsa - düşünmək və nəticələr çıxarmaq üçün vaxtı var. Çünki qarşıda bizi daha qlobal layihələr gözləyir və Ermənistan bunun hər birindən kənarda qaldıqca, bu ölkənin iflası prosesi bir o qədər yaxınlaşır”.

Politoloq Fikrət Sadıxov bildirdi ki, BTQ-nin reallaşması Ermənistanın təcrid edilməsində yeni bir addımdır: "Vaxtilə bizə qarşı ABŞ tərəfindən 907-ci düzəlişi ona görə tətbiq etmişdilər ki, guya Ermənistanı, Dağlıq Qarabağı təcrid etmişik. Amma bu dəfə Ermənistan o qədər təcrid olunacaq ki, onların nəfəs alması belə çətin olacaq. Ermənilər bu layihənin gerçəkləşəcəyinə inanmırdılar və hətta bir sıra erməni ekspertləri yazırdılar ki, bu marşrutun mürəkkəb relyefi nəzərə alınsa, onun reallaşdırılması mümkünsüzdür və inandırıcı görünmür. Lakin indi Ermənistan bu layihəyə qoşulmaq istəyir və bununla bağlı fikirlər səsləndirilir. Çox maraqlıdır ki, inanmayan tərəf, indi bu layihədə iştirak etmək istəyir. Təbii ki, Azərbaycan buna heç vaxt razılıq verə bilməz. Ona görə ki, bu layihəyə qoşulmanın bir sıra şərtləri var. Ən əsas şərtlərdən biri Ermənistanın işğal etdiyi Azərbaycan torpaqları azad olunsun və Dağlıq Qarabağ problemi həll edilsin. Məhz bu mənada layihənin əhəmiyyəti həm iqtisadi, həm strateji, həm də siyasi baxımdan böyükdür. Çünki Bakı-Tbilisi-Qars hər iki qitəni birləşdirən ən qısa nəqliyyat marşrutudur. Bura həm də Xəzər hövzəsi dövlətləri qoşula və öz yüklərini daşıya bilərlər. Necə ki, artıq Qazaxıstan bunu etdi. Bu layihənin reallaşması təbii ki, regionda Azərbaycanın əhəmiyyətini daha da artırır. Nəqliyyat marşrutu ölkəmizin maraqlarına cavab verir və Azərbaycan bundan sonra daha da regional əhəmiyyətli bir oyunçuya çevrilir”.

F.Sadıxov qeyd etdi ki, yeni layihə ilə Ermənistana daha bir zərbə vuruldu: "Onların faktiki olaraq çıxış pəncərəsi İrandır və ermənilər yaxşı başa düşür ki, regional layihələrdən kənarda qalmaqla daha iqtisadi çətinliklərlə üzləşəcəklər və ölkədə yoxsulluğun səviyyəsi artacaq. Demək olar ki, Ermənistan artıq dalana dirənib. Ermənistanın bu layihədə hər hansı iştirakı ilə bağlı arzusuna faktiki olaraq nöqtə qoyduq. Hətta Gürcüstan üzərindən bu layihədə iştirak etmək istəsələr belə, buna heç vaxt Türkiyə razılıq verməyəcək. Çünki Türkiyənin Ermənistanla heç bir diplomatik əlaqəsi yoxdur. Bu da futbol termini ilə desək, Ermənistanın oyundankənar vəziyyətə düşməsinə gətirib çıxardı”. \\kaspi.az\\
Oxşar xəbərlər
«    İyun 2018    »
BeÇaÇCaCŞB
 123
45678910
11121314151617
18192021222324
252627282930 
Mədəniyyət