Daha bir tibb ocağı qanunlarımızın ziddinə gedir… – İTTİHAM VAR

Daha bir tibb ocağı qanunlarımızın ziddinə gedir… – İTTİHAM VAR











Mövzuya dair ötən saylarımızda dərc etdiyimiz materiallarda da qeyd olunduğu kimi, bu gün ölkənin səhiyyə sistemində mövcud olan bir çox problemlər məhz respublikamızda fəaliyyət göstərən özəl klinikalarla bağlıdır

İlk növbədə diqqəti cəlb edən məqam budur ki, bu tibb müəssisələrində xəstələrə təklif olunan xidmətlərin qiyməti özünü doğrultmayacaq qədər yüksək olur. Bunun müqabilində isə, göstərilən tibbi xidmətlər mahiyyət etibarı ilə aşağı səviyyədə, bəzən isə hətta sağlamlıq üçün ziyan doğura biləcək bir həddə olur. Redaksiyamıza daxil olan məlumatlarda isə, bu gün Azərbaycanda reklam kampaniyası kifayət qədər güclü təşkil olunmuş “Avrasiya Xəstəxanalar Qrupu”na daxil olan tibb müəssisələrinin fəaliyyətində müşahidə olunan ciddi nöqsanlara dair iradlar irəli sürülməkdədir. Məlum olduğu kimi hazırda “Avrasiya Xəstəxanalar Qrupu”na iki xəstəxana, Akademik Həsən Əliyev küçəsi, 15 ünvanında yerləşən “Avrasiya” hospitalı və Azadlıq prospekti, 189 ünvanında fəaliyyət göstərən “Avrasiya” klinikası aiddir. Hər iki müəssisə tamamilə müstəqil formada fəaliyyət göstərsələr də, “Avrasiya Xəstəxanalar Qrupu”na ümumi rəhbərlik “qrupun” sahibi Qafur Cəfərov tərəfindən həyata keçirilir. Daxil olan açıqlamalar görə, bu gün bu xəstəxanalarda tibbi xidmətlərə görə müəyyən edilmiş qiymətlər, hətta bir çox digər özəl klinikalarla müqayisədə belə olduqca yüksəkdir. Xüsusilə “Avrasiya” klinikasındakı tibbi xidmətlər arasında ən bahalı olanı cərrahiyyə əməliyyatlarıdır. Məsələn, ürək əməliyyatlarının qiyməti orta hesabla 3 000 -10 000 manat arasında dəyişir. Ginekologiya şöbəsindəki qiymətlər normal doğuşda 600-1000 manatla, qeysəriyyə əməliyyatı isə, 1200-2000 manat civarındadır. Qanın ümumi müayinələri orta hesabla 15- 40 manat, ultrasəs müayinəsi 20-50 manat, tomoqrafiya müayinəsi isə, 60-140 manatdır. Digər tərəfdən isə, iddialara görə, hər iki müəssisənin müasir avadanlıqlarla təshiz olunduğuna baxmayaraq, burada həyata keçirilən müayinələrin dürüstlüyü, müalicə prosedurlarının isə effektivliyi böyük şübhələr doğurur. Mənbələr hər iki klinikada belə vəziyyətin yaranmasına əsas səbəb kimi məhz maddi gəlir faktorunun burada hər zaman üstünlük təşkil etməsilə bağlayırlar. Məlum olduğu kimi, tibbi xidmətlərə görə daha yüksək qiymətlər məhz xaricdən dəvət olunan və ya xarici ölkələrdə iş təcrübəsi olan yerli həkimlərin qəbuluna görə müəyyən olunur. Yeri gəlmişkən, elə “Avrasiya” hospitalının rəsmi saytında da bu xəstəxanın baş həkimi İlyas Həsənovun bir çox xarici ölkələrdə qatıldığı müxtəlif tibbi kursların siyahısı kifayət qədər böyük yer tutur. Eyni zamanda da bir sıra digər özəl tibb müəssisələri kimi “Avrasiya” klinikası da xarici ölkələrdən həkim mütəxəssislər dəvət edib onların reklamı ilə də məşğul olur. Bu mütəxəssislər isə, yüksək qiymət müqabilində tibbi xidmət göstərirlər. Deyilənlərə görə, dəvət olunan xarici həkimlər çox zaman hər hansı müqavilə olmadan çalışırlar. Halbuki, mövcud qaydalara görə, xarici mütəxəssis dəvət edən özəl tibb müəssisəsi bir ay öncədən Səhiyyə Nazirliyinin Tibbi Yardımın Təşkili Şöbəsinə bununla bağlı ətraflı məlumat verməlidir. Həmçinin, xarici mütəxəssislərin özəl müəssisədə fəaliyyət göstərəcəyi müddət, özəl müəssisə ilə mütəxəssis arasında əməkdaşlıq barədə bağlanmış müqavilənin surəti və mütəxəssis barədə məlumatlar da Səhiyyə Nazirliyinə təqdim olunmalıdır. Yalnız bundan sonra xarici mütəxəssislərin özəl klinikalarda fəaliyyətinə icazə verilir. “Avrasiya Xəstəxanalar Qrupu”na aid olan müəssisələr isə, əksər hallarda bu mühüm tələbə əməl etməkdə maraqlı görünmürlər.
Əldə etdiyimiz məlumatlarda daha bir diqqətəlayiq məqam, Qafur Cəfərovun rəhbərlik etdiyi bu klinikaların vergi ödəmələrindən yayınmalarda da ittiham olunmaları ilə bağlıdır. Mənbə bildirir ki, hətta bu məqsədlə klinikalarda işləyən personalın sayı da real olduğundan xeyli az göstərilir…

Məsələyə qarşı tərəfin də münasibətini öyrənməyə hazırıq.